Close

د بدلمنۍ څخه د توبې داستان

يو بد سړی ؤ چي خپل ټول عمر يې نه يوازي پخپله بدفعلۍ کړي وې بلکه نور يې هم دغه کار ته هڅول او د دغه کار دلالي يې کوله. خو د زړېدو سره يې د بدفعلۍ کاروبار هم مخ په سړېدو سو. هر څومره چي يې عمر زياتېدی هومره ورڅخه د بدلمنو کمه حيا کېدله.

يو وخت داسي راغلی چي دغه سړی ډېر زوړ سو او نور نه ورته عفت پلورونکي پاته سول او نه هم د عفت پېرېدونکي. د خپل عمل له کبله په ښار کي نه چا ورسره کومک کاوه او نه يې ورباندي زړسوی. همدا ؤ چي دغه سپينږري سړي نور د بدو کارونو څخه توبه وکاږله. شپه او ورځ په سجدو او سروکال په روژو سو. شپه به يې په عبادت او ورځ به يې په ژړا او استغفار تېروله.

يوه شپه شيطان دغه سپينږيري ته د انسان په بڼه راغلی او ويې ويل:

« ما د قارون خزانې موندلي دي. د دغو خزانو په مصرفولو سره ما په نړۍ کي هر ډول کارونه کړي او ازمويلي دي. خو د گور پر غاړه ولاړ يو سپينږري او عابد سړي ارمان مي پر زړه پاته دی. هر هغه څوک چي زما د زړه دغه ارمان په رضا پوره کړي نو به ورته خپلي ټولي خزانې وسپارم.»

سپينږري سړي د انسان په بڼه راغلي شيطان ته په غوږ کي يوه پټه خبره وکړه. د هغه وروسته شيطان ولاړی او يوه رسۍ يې راوړله او سپينږری يې ټينګ په وتړی. خو سپينږري په ژړا او غوغا پېل وکړ او همدغه خبره يې تکراروله: « آ خدايه، آ خلکو، تاسو وينی چي لاسونه مي تړلي دي. زه يې نه غواړم خو دغه کار زما سره په زور کيږي.»

په همدغه فعل سره د سپينږري نفس وختی او روح يې قبض سوه.

کله چي د ښار خلکو دغه سړی ښخ کړی نو يې پر قبر ودرېدل او لاسونه يې پورته کړل، ويل يې: « خدای دي يې وبخښي، خو ګومان مو نه کيږي.»

احمدولي اڅکزی، د ۲۰۱۳ کال د نوامبر ۳۰مه نېټه. 

 د احمدولي اڅکزي د نکلونو ليسټ او لينکونه
http://bit.ly/2h9CRwc

د قاموسونه ټکی کام ټول اعلانونه
http://bit.ly/2fZf7dO

د تکراري سوالونو جوابونه FAQ
http://bit.ly/1IZm3uV

د قاموسونه ټکی کام څخه د کار اخيستلو ويډيو
http://bit.ly/2gXsf0v

۲۴ وړيا پښتو قاموسونه د اندرويد موبايل له پاره
http://bit.ly/1IFKLAw

د آی فون لپاره هم د پښتو قاموسونو اېپ خپور سو
http://bit.ly/1T2nC0U

«جادو ته ورته» د پښتو قاموسونو پروګرام آنلاين سو
http://bit.ly/2dUVS3U

ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه

Loading...
Loading...