Close

«اي ستا په دا پک سر کي...»

ولسمشر بايد څنګه وي (څلورمه برخه)

ويل کيږي چي د افغانستان د اروزګان ولايت خلک د خپل والي جان محمد خان صاحب څخه ډېر په عذاب سول. پر والي صاحب باندي خلکو تور لګوی چي د هرې هغي لوېشتي مځکي پر سر يې خپله برخه اخيستله چي په دغه ولايت کي به ورباندي کوکنار کرل کېدل. ويل کيږي چي پدې توګه سره والي صاحب د بزګرانو څخه هر کال په لسګونو مليونه امريکايي ډالره باج اخيستی. پر خدای بخښلي جان محمد خان صاحب باندي تور لګول کيږي چي خپل دلالان به يې و کرونده ګرو ته ورلېږل او د هغوی په مرسته به يې خپله برخه ترې اخيستله. هغه بزګر چي په کوکنارو کي به يې د والي صاحب برخه نه ورکوله، هغه پدې ګواښل کېدل چي کوکنار به يې له منځه يووړل او نور تاوان به هم ورته ورسيږي. د دې تر څنګ د ولايت په هره لويه پروژه کي هم د والي صاحب برخه معلومه وه.

خو د ولايت خلک د والي صاحب د ادعا کېدونکي باج اخيستنې څخه دومره په عذاب نه ول لکه د هغه ادعا سوي قومي تعصب څخه چي په عذاب ول. ويل کيږي چي دغه پخواني والي صاحب د خپل قوم پرته نور ټول قومونه تر پوزي راوستلي ول او په ښکاره توګه يې قوم او قومبازي کوله. همدا ؤ چي د ولايت يو څو سپين ږري او مشران سره راټول سول او دا پرېکړه يې وکړه چي ښاغلي ولسمشر جلالت مآب حامد کرزي صاحب ته به د دغه والي شکايت کوي.

دغه سپينږري د خپل ولايت څخه د کابل پر لور روان سول. دا چي تر ارګ پوري به هغوی په کومو تکليفونو، انتظارونو، مصارفو او تلاښيو ځان رسولی وي، يوازي دغه سپين ږري او د هغوی خدای په خبر دی. پسله زيات انتظار څخه دغو سپين ږرو ته يو وخت واری ورسېدی چي د ښاغلي کرزي سره ملاقات وکړي. دوی په ارګ کي په يوه کوټه کي کښېنول سول چي وروسته ورته ښاغلی کرزی صاحب هم راننوتی. سپين ږري د احترام څخه و ولسمشر ته راولاړ سول چي ستړې مسې ورکړي. خو کرزي د سلام څخه مخکي ورباندي ږغ کړی:

« بېله د والي د شکايته چي بل هر څه واياست ښه راغلاست. خو د والي شکايت به نه راته کوئ. هغه نه بدلوم.»

بله صحنه:

هغه والي چي د ولايت خلک يې د شکايت کولو لپاره کابل ته راغلي ول، خو بېرته نااُمېده له ارګ څخه ولېږدول سول، يو وخت دغه والي پخپله په ارګ کي موجوده ؤ. پدغه ورځ حاضر يو بل کس نکل داسي بيانوي:
« د ښاغلي ولسمشر کرزي او د والي صاحب تر څنګ يو شمېر نور مهمه حکومتي کسان او د کابينې غړي پر مېز ناست ول. کرزي صاحب والي مخاطب کړی او ورته ويې ويل چي: ٬٬راسه کابل ته راسه، په ... کي څه کوې؟ دلته به کور درپيدا کړو.٬٬ خو د والي صاحب جواب يو شمېر حاضرين ډېر حيران کړل. هغه ولسمشر کرزي ته وويل:  اي ستا په دا پک سر کي............

کرزي صاحب په ښکاره توګه د والي صاحب ښکنځل واورېدل خو تر بل غوږ يې بېرته وايستل او مخ يې د حاضر يو بل کس خوا ته واړوی او د هغه سره يې خبري پېل کړي. کرزي ځان داسي تېر کړی لکه ښکنځل چي يې له سره نه وي اورېدلي.»

ولسمشر بايد داسي څوک نه وي چي په عام محفل کي ورته يو والي ښکنځل کوي خو دی نه يوازي دا چي چوپه خوله پاته کيږي بلکه آن د دغه والي صاحب په هکله د خلکو شکايتونو ته لا هم غوږ نه نيسي.


د ليکنو د دغې لړۍ ټول نکلونه رشتيا دي

ـــــــــــــــــــــــــــــــــــــــــــــــــــــــــــــــــــــــــــــــــــــ

ورته مطالب

ولسمشر بايد څنگه وي؟ (لومړۍ برخه)
ولسمشر بايد څنگه وي؟ (دويمه برخه)
«د ولسوال لور په رشتيا هم ډېره ښايسته وه.» ولسمشر بايد څنګه وي (دريمه برخه)
د بن بن بازار او کش کاذبک نکل
ايا سوله به ښه وي او که دا چي...

Loading...
Loading...