سم سم يې وايه! لنډ نکل

 خدای بخښلي معلم صاحب ق. راته لاندنۍ کيسه کړې وه:
کله چې زه لا د ښوونځي زده کوونکی وم نو له کلي څخه سپينږری حاجي کاکا چې موږ ورسره د لېري خپلوي لرله زموږ کور ته مېلمه راغلی و. تاريکي او غريبي وه نو ما هم د مېلمه په خونه کې څراغ ته درس وايه. هغه راڅخه پوښتنه وکړه: «ق. څه شی وايې؟» ما ورته وويل: «حاجي کاکا سبا مي د انګرېزي امتحان دی، هغه ته تمرين کوم.» هغه راته په غوسه وويل: «راشه ماته دي سبق تېر کړه.» زه هم ورغلم او مخې ته يې کښېنستلم او درس مې ورته شروع کړ: «ابراهيم ايز مای ټيچر. هي ايز ويري ګُود ټيچر. هي ايز ترټي يېړز اولډ...» ما صرف دغه څو جملې ويلي وې چې پر سترګو مي تکه توره تاريکه شوه. څو ثانيې وروسته چې مې بېرته پر سترګو رڼا شوه نو په چپه غوږ کې مي ډېر سخت شپېلکی ږغېدی. د حاجي کاکا ږغ مې نه اورېدی خو د شونډو له حرکت څخه يې پوه شوم چې راته ويل يې: «سم سم يې وايه!» حاجي کاکا چې په ژوند يې نه انګرېزي اورېدلې او نه يې زده کړې وه، و ماته سخته چپلاخه/څپېړه راکړې وه، ځکه چې فکر يې کاوه، ما سم درس نه و زده کړی. هغه هم په داسې حال کې چې آن راسره نژدې خپلوي يې نه لرله او ما د ده د کور نه بلکه ده تازه تازه زموږ د کور ډوډۍ خوړلې وه.

احمدولي اڅکزی، د ۲۰۲۳ کال د جنورۍ ۲۲ نېټه

___________
دغي ليکنې ته لنډ لينک:
https://t1p.de/loyas
___________