Close

ولسمشر بايد څنگه وي؟ (دويمه برخه)

والي صاحب عالي قدر د المان په هامبورګ ښار کي په يوه شپه تر يو لک يورو څخه زياتي پيسې په قمار کي بايلولې.

 د المان يوې مشهوري ورځپاڼي د افغانستان د يو مشهور ولايت د مشهور والي په هکله يو نامشهور مطلب خپور کړی دی. دا چي د دغې ليکنې مقصد د دغه قماربازه والي صاحب رسوا کول ندي نو په ليکنه کي صرف «والي صاحب» د هغه د اصلي نوم پر ځای کارول کيږي.


د المان د مشهوري ورځپاڼي پدغه مطلب کي راغلي چي عالي قدر والي صاحب په کال کي دوه واري د المان هامبورګ ښار ته راځي. هر کله چي دغه والي صاحب هامبورګ ته راسي نو د ورځپاڼي په وينا خامخا د هامبورګ هغه مشهور ترينه کازينو يا د قمار ځای ته خامخا ورځي. د ورځپاڼي په دغه مطلب کي د عالي قدر والي صاحب انځور هم چاپ سوی دی.


د دغې المانۍ ورځپاڼي په راپور کي د والي صاحب د يوې شپې داستان بيان سوی دی. په مطلب کي راغلي چي والي صاحب د شپې په سر کي د هامبورګ يادي مشهوره قمارخانې ته ورغلی او تر شلو زرو يورو څخه يې زياتي پيسې په قمار کي وګټلې. د هغه وروسته والي صاحب چي په دريشي کي راغلی ؤ بېرته د کازينو څخه دباندي ولاړی او د شپې په آخري برخه کي يو ځل بيا راغلی. خو د دې واري يې جامې بدلي کړي وې او په افغاني کالو کي حاضر سو. والي صاحب چي بيا قمار شروع کړی نو يې په پرله پسې توګه تر يو لک او شلو زرو يورو څخه زياتي پيسې وبايللې او د سهار خوا ته د قمارخانې څخه ولاړی. د يادولو وړ ده چي هامبورګ د المان هغه ښار دی چي د فحشا لپاره هم مشهوره دی او ويل کيږي چي د ښار داسي برخي سته چي صرف او صرف د فحشا لپاره ځانګړي سوي دي.


ياد والي صاحب نه يوازي دا چي د المان هامبورګ ښار ته د «مېلو» لپاره ورځي بلکه د هالنډ و امسټرډام ښار ته هم خامخا تشريف وړي. آمسټرډام هم د فحشاؤ او هم د چرسو لپاره مشهور دی. کله چي والي صاحب په هامبورګ يا په امسټرډام کي وي نو هغه د غوړه مالانو ډله هم همېشه په پسې وي او که د چرسو د يوه سګريټي پای وي نو د بل سر وي.


ولسمشر، امير، والي او مشر بايد د دغه والي صاحب په څېر نه وي چي د ملت څخه غلا کړي پيسې په افغانستان دننه کي او د افغانستان څخه بهر په منکرو کارونو باندي مصرف کړي.


ولسمشر بايد داسي هم نه وي چي د ياد والي صاحب په ډول ناروغه انسانان واليان، رئيسان او اميران کوي.

 

(د ليکنو د دغې لړۍ ټول نکلونه رښتيا دي.)
ـــــــــــــــــــــــــــــــــــ

ورته مطالب

 ولسمشر بايد څنگه وي؟ (لومړۍ برخه)

ما پر مُلا ايمان ندی راوړی

پښتونستان مه څېړﺉ

ژبنيز او قومي تعصب د بربادۍ لاره ده

د زنګاوات و نانۍ شهيدي ته