چي ؤ يو شهزاده ؤ. دغه شهزاده غوښتل چي د يوې اصلي او زيات زړسوی لرونکي شهزادګۍ سره واده وکړي. دغه شهزاده په ټوله دنيا کي وګرځېد خو اصلي شهزادګۍ يې پيدا نه کړه.
يادونه: نور منثور او منظوم نکلونه پر کوچنی ټکی کام www.kochnai.com هم موندلای سئ.
چي ؤ يو شهزاده ؤ. دغه شهزاده غوښتل چي د يوې اصلي او زيات زړسوی لرونکي شهزادګۍ سره واده وکړي. دغه شهزاده په ټوله دنيا کي وګرځېد خو اصلي شهزادګۍ يې پيدا نه کړه. دغه شهزاده داسي فکر نه ؤ کړی چي د اصلي شهزادګۍ پيدا کول به دومره مشکل کار وي.
شهزاده او د شهزاده مور او پلار زياتي شهزاديګياني پيدا کړې خو يوه لا هم اصلي شهزادګۍ نه وه. همدا ؤ چي شهزاده او د شهزاداه مور او پلار يعني پاچا او ملکه ستړي او په خپله کلا کي نااُميده کښېنستل.
يوه ورځ ډېر زورور باران اورېدی. له آسمان څخه د تالاندي او برېښنا ږغونه راتلل. په داسي يو بد موسم کي د باچا د کلا دروازه وټکول سوه. کله چي پاچا دروازه پرانستله نو يې يوه لنده خيشته انجلۍ وليدله چي د کلا د دروازې مخي ته ولاړه وه. د انجلۍ ورېښتان، کالي او بوټونه ټول په اوبو لانده خيشته ول. دغې انجلۍ وويل چي لاره يې ورکه کړې او غواړي نن شپه د ملکې مېلمنه سي. دغې انجلۍ ويل چي هغه يوه شهزادګۍ ده. پاچا د ځان سره وويل: «دا خو به معلومه سي چي ايا ته يوه اصلي شهزادګۍ يې که نه.»
پاچا خپلې ملکې ته ږغ وکړ چي راسه يوه مېلمنه راغلې ده. ملکې هم دغه انجلۍ کلا ته راوسته او ورته د ځان وچولو له پاره يې ټوالونه او وروسته نوي جامې ورکړې.
ملکې غوښتل چي ځان ته معلومه کړي چي ايا دغه مېلمنه په رشتيا هم يوه اصلي شهزادګۍ ده که نه. مېلمنه په بله خونه کي وه او ځان يې له اوبو وچاوه. همدا ؤ چي ملکې د مېلمنې د خوني دننه له کټ څخه کوربچه یا نالۍ ليري کړه. ملکې د کټ پر منځ يې يو کوچنی ګردی نخود کښېښود او بيا يې شل پستې پستې له مالچو او وړيو جوړي سوي نالۍ او د هغو پر سر يې له بڼکو ډک شل تلتکان د کټ پر سر هوار کړل. دغه کټ چي ورباندي شل پستې نالۍ او شل پاسته تلتکان هوار ول، دومره جګ سو چي کله چي مېلمنه دغې خوني ته راغله نو مجبوره وه چي د يوې جګي ځينې په مرسته دغه کټ ته وخيژي.
کله چي سهار سو او مېلمنه انجلۍ راکښېنسته نو ملکه ورته راغله. ملکې له مېلمنې انجلۍ پوښتنه وکړه: «شپه دي څنګه تېره سوه؟ ايا خوب دي پوره سو؟» انجلۍ ورته وويل: «ټوله شپه مي نا آرامه تېره کړې ده. بالکل آرامه نه يم بيده سوې. بدن مي تک شين دی ولي چي بستر مي نا آرامه ؤ. داسي احساس مي کاوه لکه په بستر کي چي مي يو شی وي.»
کله چي ملکې د انجلۍ دغه جواب واورېد نو ډېره خوشاله سوه. ملکه پوه سوه چي د زيات لټون وروسته يې د لومړي ځل له پاره يوه اصلي شهزادګۍ پيدا کړې ده. ملکې د دې څخه تر مخه هيڅکله داسي نازولی او نازک انسان نه ؤ ليدلی چي د شلو ناليو له سر څخه لا تر بستر لاندي نخود احساس کړي. ملکې د ځان سره وويل: «بېله يوې اصلي شهزادګۍ بل هيڅوک داسي نازولی او نه سي کيدلای.»
ملکې او پاچا ولي د خپل زوی له پاره داسي يوه اصلي شهزادګۍ لټوله؟ په دې خاطر چي هغوی په دې باور ول چي هر هغه څوک چي د ځان له پاره يو کوچنی درد احساسوي، هغه بايد د نورو انسانانو درد هم احساس کړي او هيڅکله چا ته ازار ونه رسوي.
همدا ؤ چي باچا او ملکې د خپل شهزاده زوی واده د دغې شهزادګۍ سره ور وکړ.
که څه چي دغه نکل رشتيا نه دی، خو څوک ورڅخه داسي درس اخيستلای سي چي بايد انسان د ځان تر څنګ د نورو انسانانو درد هم احساس کړي. يوازي هغه څوک يو اصلي او ښه انسان دی چي پر نورو انسانانو يې حتی د نخود په شان زحمت هم نه وي پېرزو.
ښه سو چي را په ياد سو. نژدې ؤ چي هير سوی مي وای. هغه نخود چي د شهزادګۍ تر بستر لاندي ايښودل سوی ؤ، ډېر مشهور سو. دغه نخود وروسته په يو موزيم کي کښېښودل سو. که چا نه وي خوړلی نو ښايي تر نن پوري لا په هغه موزيم کي پروت وي.
کيسۍ ولاړه پورته
زه راغلم کور ته
پښتو ژباړه او زياتونې: احمدولي اڅکزی، د ۲۰۱۶ کال د نوامبر ۱۶مه نېټه، بون
ليکونکی: Hans Christian Andersen
د نکل اصلي نوم (ډنمارکي): Prinsessen på ærten
د کتاب نوم او د چاپ کال: Eventyr fortalte for Børn, 7. April 1837
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د کاپي کولو په صورت کي د دغه ليکنې اصلي لينک او د ليکوال نوم يادول ضروري دي.
Legal Note حقوقي يادونه
ــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــــ
د دغه وېبلاګ لاندنۍ نوري ليکنې هم ولولئ:
ول ول جانه او درې ايږان ـ د ماشومانو نکل
ورور که پنير ـ د ماشومانو منظوم نکل
د کټ خېزونه ـ د ماشومانو منظوم نکل
پر نس مي درد دی الوۍ ـ د ماشومانو منظوم نکل
هندو مسلمان ـ منظوم نکل
د ځنګل جګړه ـ منظوم نکل
مچمچۍ او زمری ـ منظوم نکل
خواږه شيان ـ د ماشومانو منظوم نکل
خر او پاچهي ـ منظوم نکل
د ښامار هګۍ ـ منظوم نکل
د سپي او بيزو پاچهي ـ منظوم نکل
موږک پهلوان ـ د ماشومانو منظوم نکل
حلال چينايي ـ منظوم نکل
له بلي نړۍ ـ منظوم نکل
د پردېس سلاته ـ منظوم نکل
سوالګر او سخي ـ منظوم نکل
ژوند او هنر ـ منظوم نکل
منطق او تعليم ـ منظوم نکل
دوه سره يو بوک ـ منظوم نکل
ازلي وږي او ښادي ـ منظوم نکل
د کوزدې جرګه ـ منظوم نکل
اوه بزګړي او شرمُښ ـ منظوم نکل
قلم و قلم ته ـ منظوم نکل
تور مُلا او سپين مُلا ـ منظوم نکل
پيری ـ منظوم نکل
ايکاروس (ژباړه له يوناني اساطيرو) ـ منظوم نکل
پردۍ بڼکي ـ منظوم نکل
کارغه او ګيدړه ـ منظوم نکل
نامانوس بوی ـ منظوم نکل
د ناديده ګانو کلی ـ منظوم نکل
سوی او کيشپ ـ منظوم نکل
دېب په بوتل کي ـ منظوم نکل
کڼه چونګښه ـ منظوم نکل
يوازي نانی ـ د ماشومانو لپاره منظوم نکل
سرزوره منطق ـ منظوم نکل
نکاح د ع و غ ـ منظوم نکل
دوه سادګان ـ منظوم نکل
لس موږکان ـ د ماشومانو لپاره منظوم نکل
وړه زڼه ـ منظوم نکل
تا مسيحيت کړلی افغان ـ منظوم نکل
يا شل پيازه يا شل دُرې ـ منظوم نکل
پاچا، وزير، غلام او ړوند سړی ـ منظوم نکل
زمری او نانی موږک ـ د ماشومانو لپاره منظوم نکل